Maht kolgâččij porgâđ, et parga pehtilávt já puáhtá pyereest vuáijuđ pargosis? Tieđâalmai Cal Newport västid taas. Suu mield taas láá nelji vyevi. Jieš sun iská vistig-uv velttiđ puohlágán ääigituálvoo hokâttâsâid tego sosiaallii media. Sun ij keevti šleđgâpoostâgin mielâstis. Mut taatkin ij vala toovâ ulmust taggaar, kote vuáiju paargon.
Vistig-uv Newpoort noomât ohtuunisorroom, ovdâmerkkân ävđintáálust orroom, kost ij lah Internet. Tuáimá-uv taatkin ain, tast jiem tieđe. Tiäđám kale saksalii paarâ, kote ain ihepiälán varrij miäcán čäälliđ. Já tiäđám EU-komissio jurgâleijeid, kiäin lii kiävtust nuuvt kočodum paaniikviste. Tobbeen ij uážu sárnuđ, mut toho puáhtá nááđđuđ porgâđ ráávhust, jis ij haalijd, et kihheen hettee. Toho ij uážu tuálvuđ puhelin ige maiden muidegin, mii sátáččij koskâlduttiđ. Šiev päikkikonstâ lii ovdâmerkkân puhelin časkâdem já tot, et ij surffaa eidu talle neetist.
Nubben táválâš vyehin, maid ovdâmerkkân tietteeh kevttih, lii pargoi äigitavâlistem. Mottoom professor juáhá ivvees tárkká nuuvt, et tuše tiätuperiodij ääigi sun máttát. Loppâääigi sun lii kale táálust mut kiävttá ääigis tieđâlâš almostitmijd. Taat lii-uv šiev vyehi. Iiskâm jieš kevttiđ taam nuuvt ennuv ko máhđulâš.
Kuálmádin vyehin lii jurdâččempargoi ryytmi kavnâm. Komikkár Jerry Seinfeld sáárgui jyehi peeivi ruosâ toos, kuás sun lâi porgâm vicijgijn. Já ruosârááiđu ij mielâstis halijdâm uáiniđ potkânmin.
Niäljád vyevi sun lii nabdam journalistmetodin. Tot lii taggaar, et maaŋgah rijjâpuudah (20 min - tijme) kiävttojeh kirjealmostitmij oovdedmân. Taat lii meiddei muu vyehi čäälliđ blogičalluid. Ij taarbâš leđe äigi ko suullân 15 - 20 minuttid peeivist oovtâ blogin. Ideai várás ferttee kale tipteđ čolmijdis áávus ubâ ääigi, tastko toh tarbâšuvvojeh ennuv. Luhhoost ideaid puáhtá uđđâsistanneeđ, já ain šadda uđđâ maainâs, ko ääši juurdâš nube perspektiivist. Taat meetood kale váátá jurdâččemvuovij jotelis muttemnaavcâid, nuuvt et piäsá älkkeht ääšist nuubán.
Tot še iššeed, jis váátá alnestis vuáijum mottoom áášán veik 15 minuttân. Tastmaŋa vuáijum puáhtá vuod ložžiđ. Motomeh vuod rävvejeh, et jis pargoost láá ahevis uásih, taid kannat porgâstiđ vistig meddâl. Talle taid ij taarbâš jurdâččiđ ubâ peeivi já tain piäsá meddâl. Puoh ahevis ääših läävejeh leđe energiaporreeh.
Newport addel meiddei love láškuttâlmân. Sun iätá, et jis áigu vuáijuđ aššijd, talle kalga huolâttiđ tast, et lii ennuv rijjâäigi. Ij innig pargopoostâ luuhâm ehidist ige sosiaallâš media. Uážžu ahevuššâđ-uv, jis toos lii tárbu. Talle šaddeh pyereh ideah.
Käldee: NRC 30.3.2016
Ei kommentteja:
Lähetä kommentti