Virgeulmuu puárisolmooš

Tie sun lâi
vuossâmuu keerdi eellimstis stemppâláin
PUÁRISOLMOOŠ
vuoi hirmos

Veik maht iiskâi čielgiđ
luuŋkâ nisonân
et puárisulmuuh lijjii ereslágáneh
tuođâi-uv puáráseh
tagareh kiäh iä ohtuu piergim
ij tot maiden išedâm
tääl sun lâi puáris

Muu jiermi ij tuhhiittâm
ij puáris puáhtám leđe tot
kote piergij ohtuu
kaačâi tego cuáŋuiriävská
tipšoi ašijdis
táálus
oonij huolâ iärásijn
tooimâi omâhâstipšon
tuubdâi kale ucánjihhii epivisesvuođâ
digitaallii maailmist

Ij toos ennustkin tarbâšâm
uccâ saajeest
et šoodâi puárisin
tarbâšij tuše tom
et tarbâšij
sáátu siijdân
toimâttiđ ašijdis
tondiet ko
vyeijimkorttâ
ij lamaš

Kihheen ij kavpugist taam eeđâ
et lii puáris
jis taarbâš sáátu káávpán
poostân
vuoptâidis čuopâttiđ
tuáhtárân já apteekân
kale maailm tobbeen-uv siämmáánáál siähán
jis bussi já metro
iävá jođe
vyeijimkoortâst
ij lah kihheen
kuássin
kavpugist
sárnumgin

Maailm tuárispeln
vyeijimkortâttes olmooš
kiäst ij lah tiätumaašin
ige printter
lii automaatlávt
puáris
tassaažân ko mana autoškoovlân
finnee digitaallii vyeijimkoortâ
mašinijdis várás
šadda modernin

Sijđosiijdâ jollâvuotâ
lii tot
et
puárisvuotâ
rekinistoo
eresmuđusâš kriteerijgijn
ko kavpugist

Mun páásám smiettâđ
mii te lii
puárisvuotâ
virgeulmuu čoolmijn
já kuás tot kiäs puátá
tot
kote mitteduvvoo
nuuvt maŋgáin mittoin

Luhhoost
puárisvuođâ
ij taarbâš
meendu kuhháá
smiettâđ
nisson keigim luámáttâh
tom pyereest čielgee
puárisolmooš lii tot
kote lii tiävdám
65