Eellim kukkosâš maainâs

Tiegu sun čuážui
jyelgih suáibun
tollij kiddâ pevdinuskeest
hepânâšâi avvees
uálgiskietân iđestâm puárisvuođâ suábi
tom et idduuh iä innig suábittáá kuáddám

Tiegu sun sáárnui
tuođâlijn puárisulmuin
jieijâs eejist já eenist
vuánnámstis - ton čyeti-ihásiist
já kieldij tom
et sun kuássin puárisin iäláččij
mut mieđettij
et puárisvuotâ
lâi njaahâm
suolgâi
omâs kyessin
suu-uv roopâ siisâ
veik tom ij kihheen eres vala tubdâm

Tiegu sun muštâlij
et puárásmem ij lam hävski
ko poođij kulhijdem
mielân iä iđestâm
noomah
iäge ulmuuh
mudoi ko iärásij iššijn
mut toh liijká vala pottii

Tiegu sun julestij käähvi
já käskistij kákkupitá
tuubdâi
maht kietâ tuárgistij
eenâb ko ovdil
ige tom tuárgistem
innig mahten orostittám

Tiegu sun kuldâlij
väibee rummâšist kulluustâllee vaaivijd
smakkiistâlâi tuáhtár saanijd
et taavdah iä kuássin innig lappuuččii
pic taid koolgâi väldiđ fáárun
rähis mätkiskipárin
aneškyettiđ áárvust

Tiegu sun jurdâččij
et nuuvt maaŋgâs lijjii jo vuálgám
čuuvtij nuorâbin
čuuvtij eenâb illáellen
ige lam suotâs smiettâđ
kuás ličij kiän vuáru
veik jieijâs-uv

Tiegu sun nievdâi
peivinaharij lasseen
tien ääigist
et puáđáččij kuhheeb-uv naaveer
tot majemuš
mast ij lam innig nuuvtkin huáppu koccáđ
já tast
et tot äigi ij innig paldam
tego ovdil
pic lâi kočoškuáttám jieijâs luusâ
ráávhun

Tiegu sun murâštij
et iärásáid lâi pargo
suu tiet
já huolâ
moos ij lam maggaargin tárbu
mut ilodij
et ohstâš äigi lâi lamaš
tuárvi kukke
já smietâi
mon pyeri
já mon koorâs
eellim
lâi sunjin lamaš

Tiegu sun tuáivui
et puárisvuotâ ličij
siämmáš ko
  rähisvuotâ
  ilo
  kijttevâšvuotâ
eellim kukkosâš maainâs
mii iäláččij tiervân
já luholâžžân

elimis loopâ räi