Iđedisiijâ Tromssaast

Mon vuáimáliih láágin
iđedisiijâ kuuccum tiijmeh

Lovduu vyelni lii paahâs
uáđedijn
jurduigijn

Lehâstâm laasâ
sonottâm pakkâs olgos
Pärttidâm
patâritám jurduidân-uv
Nievdâm
já uáinám
maht toh huksejeh suájáid
já sodâsteh kiäinusis
Ama lijgoh-uv moonnâđ

Mut jiem mun ohtuu lah
kiđđâ kulloo puáttám
merâriidon
muu meddâlorroom ääigi
Merâkaijui jienniis povvâstem
já piškeris šnjirgom
vuorâččâsâi rááhum
povčâgitteh ijjâuáđđee peeljijd
covneh lussâdumos-uv naharijn
Taam mun kale tijmáást tiettim
mut jiem innig muštám

Mun kuldâlâm
jieččân ijjâráávhu
tiijmij hiđes cikkááttem
kosám tassaažân
ko iiđeed jurduidân tuálvu.