Kii lii puáris?

Ko mun lijjim pärni
já oinim pänettes ulmuid
sij lijjii puáráseh.
Tääl must alnaan váilu pääni.
Lam-uv mun puáris?
Jieččân mielâst
jiem nuuvt aheloppâ kuittâg.

Ko mun lijjim nuorâ nissoon
suullân muádilov
talle vitlov lâi puáris.
Tääl mun jieš aldanâm viđâlov.
Lam-uv mun puáris?
Jieččân mielâst
jiem lah nuorâ innig
mut jiem mihheen aheloopâid kuittâg.

Ko mun lijjim kulmâlov
já valdim vuástá murâšsaavâ:
mottoom hoovdâ viđâlovihásâš kálgu
lâi kuáđđám taan maailm.
Mun šalâšim
já smiettim
et suu párnááh láin jo rávásmâm
Vitlov lâi talle-uv viehâ puáris
veik ij mihheen táválijd háávdánvierâleijeid kuittâg.

Tääl ko jieš aldanâm viđâlov
já jurdâččâm eellim
mon jieš tääl iälám
Must lii lamaš riges, šiev eellim
Mun máátám väldiđ tom vuástá
tagarin ko tot puátá
Jiem lah innig nuorâ
jiemge mihheen aheloopâid kuittâg

Jieččân uáinust puárisvuotâ muttoo
Tuubdâm ulmuu
kote lii jo 70-ihásâžžân puáris.
Smietâm jieččân eeni
kote tiävdá 75
sun ij lah valagin puáris.
Jieččân vuoppâ, 81, povvust
jieijâs vyeneákkurookán.
Sun lâi masa jo čyeti-ihásâš
puáris
iärásij mielâst
jieijâs mielâst ij vala nuuvtkin.

Maht mun tääl uáinám puárisvuođâ?
Toin naalijn et
olmooš lii eidu nuuvt puáris
ko sun jieijâs ana.
Ahe ij lah mihheen eres
ko puárásmuvvee ulmui
avettes sykli
mii
kostnii álgá
já juátkoo
tassaažân ko nohá.