Tullâtulppaan

Ama cokkânah

tun acâkkistee ahheev

härvibeht ko tääl

kulgâttah vorrâkonnjâl

mon ij vala pyevti čiärruđ.

Puáldáh-uv kunnân

čärvejeijee čieskâsijd

taan iijâ ääigi

posádah eellim haajâ

ruopsis čuovâkäldee siisâ

Jurâttah jurduid

volliittah jiermi jienâid

kulluumettumijd

pijnedah pekkânjušâid

mietimielâ maajeeldjotteid.

Oskolâšvuotâ

uksâluámi kerjilâš

kuovlâl ain tupán

tobdoin čájádâm naaveer

pyereh aiguuh ärdei alne

Ohtuuvuotâ, tot

oopât já oŋâttuš

addel iberdiđ

aibâšeijee sanijgijn

monâttem palolii tobdo

Ama jeđđiih muu,

tun puánhármistee ilo

tävjibeht ko tääl

lieggiih čielgâ moijáámân

mutáh soroid ilovirden

Joskâdvuotâ lii

čuovâlostâi lekkâsem

aalman kiđârdem

ruopsis tuulân kejâdem,

čuođâlmistee tullâtulppaan

MLO 4 .2.2016