Mánusâžah iä lah puácuvuotâ

Ugandast mánusâžah tovâtteh heeppâd maaŋgâ nieidân. Plan International taha nieidâi eellim älkkeebin jyehimáin tiäđu já mánusâšsuojijd.

15-ihásâš Eunice lii neeljipärnisii perruu nuorâmus. Ko suu mánusâžah algii, sun ij tiättám, mii sunjin lâi tábáhtuumin. Ko sun huámmášij voorâ pihtâsijnis, sun juurdij, et sunjin lâi sattum miinii paartijd.

– Mun jurdim, et mun lijjim aimijn čuogguudâttâm, sun muštâl.

Eunice hepânâšâi ige sun tuostâm moonnâđ škoovlân, tastko sun poolâi et iäráseh povvâstiččii sunjin. Tietimettumvuotâ mánusâžâin ij lah härvinâš Uganda eennâmtuálukuávlust, tastko maaŋgâ saajeest mánusâžah láá ain tabu, mast ij pyevti sárnuđ. Luhhoost Eunice enni, Madam Kabonese, iberdij.

– Kuo Eunice huámmášij, et sun voordij, mun muštâlim sunjin, et sun ij taarbâš leđe huolâstum já et siämmáš lii tábáhtum puoh nisonáid, Madam Kabonese iätá.

Njuottâseh ja päddi mánusâšsyeijin

Kievhivuotâ iästá maŋgii nieidâid tego Eunice huolâtmist mánusâšhygieniastis olmânáál.

– Muu vaanhimeh kolgâv vyebdiđ ennuv maissi, vâi mij pyehtip uástiđ mánusâšsuojijd. Jis ruttâ ij lah tuárvi, mun ferttiim kevttiđ čonâstuvâi saajeest njuottâsijd, Eunice muštâl.

– Ovdil valjenuurrâm mist ij lah tuárvi ruttâ. Talle mun adelâm Eunicen njuottâsijd já päädi aaleem várás. Ovdilgo mist lii vuod ruttâ mánusâšsuojijd, sun kalga kevttiđ njuottâsijd, Madam Kabonese muštâl.

Maaŋgah nieidah kevttih syeijin meiddei loostâid, pápárijd teikâ sotepittáid.

Plan International iššeed nieidâid eereeb iärrás jyehimáin hygieniatarbâšij jyehimáin škoovlâin já máttátmáin nieidáid, maht sij pyehtih huolâttiđ mánusâšhygieniastis. Näävt nieidah pyehtih tubdâđ jieijâs visesin meiddei mánusâžâi ääigi, ege sij taarbâš poollâđ heeppâdist škoovlâst.

Tiätu keeppid heeppâd

Mij porgâp meiddei mánusâžâi tovâttem heeppâd meddâlistem oovdân. Oovtâst páihálijn haaldâšmáin já škovlâigijn mij škovlip tiervâsvuotpargeid, máttáátteijeid já rijjâtátulijd sárnuđ taan fáádást.

Eunice lii jesânin mii vuáđudem tiervâsvuotriggest, mast sun máttát eres nieidáid tiervâsvuođâst já hygieniast. Sun áigu visásmittiđ, et sust nuorâbeh hyelkkinieidah tietih, mii tábáhtuvá ko sii mánusâžah älgih.

– Tiätu mánusâžâin iššeed kepidiđ palo tast, et toh liččii puácuvuotâ, Eunice iätá.

Algâalgâlâš tekstâ:

https://plan.fi/kuukautiset-eivat-ole-sairaus?utm_source=facebook&utm_medium=cpc&utm_campaign=jatkuva&utm_content=retarget_content