Ihepeivi

Ovdilgo mun vuolgim tuu kulen
ihe tassaaš
tun nobdih et mun vájálditáččim jotelávt

Mut ij, jiem mun lah vájáldittám
Ubâ ive mun lam jurdâččâm
jyehi peeivi
joskâdávt já kijttevâžžân
mut jiem lah tuu uáinám
nuuvt et liččim puáhtám tom ettâđ

Onne mun muštájim tuu käävpist
ostim konvehtrasijáá
mast luuvâi "Stuorrâ kijttoseh"
aigum tom tunjin pyehtiđ
já tärhistim kuás tun tobbeen liččih
amahân te onne, ihepeeivi

Mut jieh tun tobbeen lamaš, innig
Ilgâdis vuoiŋah lijjii vyejettâm tuu meddâl
sujâttâm tuu tast
et tun lijjih meendu pegâlmâs
lijjih piergim pyerebeht ko iäráseh
já et tun lijjih korruptistum
lahâalmaah lijjii pargoost
tuu ášáškutmin
Pargei kuuvij puotâ uáinojii eres muáđoh
laavâkulâjub eŋgâlnjeezih
kađâšteijee áámmátulmuuh
sajanviggeeh
Nievris aašijn ij pyevti nievribeht sárnuđ
pic toppâđ ubâ uásáduv
luuhâđ loopâid loostâst já neetist

Mun čierrum
sikkum konnjâlijdân
lekkim konvehtijdân
herskustâllim oovtâ ohtuunân
jurdâččim tuu
nuuvt fiijnâ ulmuu
jiemge mun valagin oskom

Mun halijdâm adeliđ tunjin loopâid konvehtijdân
ettâđ et mun lam kuullâm puoh
et mun lam murâšlâš
et fastes lattim tuu kuáttá lii stuorrâ verivuotâ
já et tun lah liijká pyeri
nuuvt pyeri
pyeremus

Stuorrâ, lieggâ kijttoseh, K.R.!
Liävus maailm tunjin ustevlâš
Jis muoi iän innig kuáhtáá
tuu pargo liijká páácá
muu ävkkin já illoon
nuuvt kuhháá ko mun iälám
já tast mun navdâšâm jyehi peeivi
Muáddi suklaapitá toos!